Koorleiers van die Klein Karoo en Tuinroete word uitgenooi na ’n inspirerende werksessie met een van Suid-Afrika se voorste koorleiers, André van der Merwe. Hierdie gratis sessie, wat ná afloop van Klein Karoo Klassique aangebied word, bied ’n unieke geleentheid om nuwe idees, praktiese vaardighede en vars inspirasie vir jou koor te ontdek.

Of jy nou ’n groot gemeenskapskoor, skoolkoor of kleiner ensemble lei, hierdie werksessie is ontwerp om jou te ondersteun en toe te rus. André deel sy insigte oor die boustene van suksesvolle koorsang, bied praktiese oplossings vir algemene uitdagings wat kore ervaar en gee waardevolle wenke.

André is koorleier van die Stellenbosch Universiteitskoor, wat onder sy leiding verskeie kere deur INTERKULTUR as die beste ter wêreld aangewys is, asook die Stellenberg Meisieskoor en Voces Cordis-koor.

Die werksessie is gratis, maar plekke is beperk. Bespreek so gou moontlik by Lizané Basson: lizane@kunste.org.za of 084 789 1477.