Vir hongerpyne is die feesrestaurant, bedryf deur die span van Oudtshoorn se eie Nostalgie, die klassieke keuse! Hier word soggens van 08:00 tot 11:00 heerlike ontbytopsies – klein én groot – bedien. ’n Allegaartjie soetgoed is deurlopend beskikbaar vir elke soettand en middagetes word tot 17:00 bedien. Vanaf 17:00 kreun die kospotte onder die aanbod vir die Klein Karoo se skep-en-weeg, óf kies à la carte vir aandete.