Take Four Piano Quartet neem die gehoor op ’n verhewe reis deur van die meesgeliefde werke in die kamermusiekrepertorium. Hierdie vier besondere dames, jarelange vriendinne en virtuose musici, kom in Augustus byeen om Vrouemaand te vier. Op hulle program is Brahms se Klavierkwartet nr. 2 in A majeur, Op. 26 – ’n werk vol verreikende lirisme, hartlikheid en lewenskragtigheid, – asook Schumann se Klavierkwartet in E-mol majeur, Op. 47, bekend vir sy poëtiese skoonheid en warm interaksie tussen die instrumente. Hierdie aangrypende uitvoering is ’n viering van kunstigheid, vriendskap, verbondenheid en die blywende krag van kamermusiek. Die uitvoering word gevolg deur ’n gratis musiekgesprek met die kunstenaars bo in die Banketsaal.